काठमाडौँ। नेकपा एमालेका महासचिव शङ्कर पोखरेलले आगामी २१ फागुनमा हुने प्रतिनिधिसभा निर्वाचनको परिणाम एमालेको पक्षमा हुने बताएका छन्।

बागमती प्रदेश सङ्गठन कमिटीले आज (सोमबार) गरेको बागमती प्रदेशस्तरीय संयुक्त कार्यकर्ता भेलामा उनले आगामी निर्वाचनको परिणामलाई आफ्नो अनुकूल बनाउने दाबी गरे।

उनले पार्टीले धेरै कार्यक्रम गरे पनि जनताको घरघरमा पुगेर संवाद गर्न भने नसकेको स्वीकारे। “हामी धेरै गतिविधि गर्दै छौँ। मुख्य कुरा जनताको घरघरमा पुगेर संवाद गर्नु हो, तर त्यो हामीले अहिलेसम्म गर्न सकेका छैनौँ। त्यो हाम्रो कमजोरी हो‚” उनले भने‚ “पहिले हामी हरेक व्यक्तिका घरघर पुगेर संवाद गर्थ्यौं। उनीहरुलाई एमाले बनाउन मेहनत गर्थ्यौं। तर पछिल्लो समय हामी उम्मेदवारका पछाडि मात्र देखिन थालेका छौँ।”

महासचिव पोखरेलले उम्मेदवारको अगाडि-पछाडि घुमेर चुनावी सफलता प्राप्त गर्न नसकिने बताए। उनले चुनावी अभियान पार्टीको आन्दोलनको भविष्यसँग जोडिएको पनि बताए। “चुनावी अभियानमा चुक्यौँ भने मुलुक राजनीतिक द्वन्द्वको क्रीडास्थल बन्नेछ। त्यसैले चुनावी अभियानमा जुट्नु आवश्यक छ‚” उनले भने।

कार्यक्रममा एमालेका सचिव महेश बस्नेतले बागमती प्रदेशले सबै निर्वाचन क्षेत्र जित्ने गरी रणनीति बनाउनुपर्नेमा जोड दिए। बागमती प्रदेश सङ्गठन कमिटीका अध्यक्ष नारायण सिलवालले कमिटीले निर्वाचन केन्द्रित अभियान सुरु गरेको जानकारी दिए।