काठमाडौँ
००:००:००
४ माघ २०८२, आईतवार
काठमाडौँ। पूर्वमन्त्री तथा नेपाली कांग्रेस जिल्ला कार्यसमिति धादिङका सभापति रामनाथ अधिकारीले पार्टीको विशेष महाधिवेशन सफलतापूर्वक सम्पन्न भएकामा सन्तोष जनाएका छन्। उनले सभापतिमा निर्वाचित गगनकुमार थापा नेतृत्वको टिमलाई बधाईसमेत दिएका छन्।
कांग्रेस नेता शेखर कोइरालानिकट अधिकारीले बधाई दिँदै अब निर्वाचनमा लाग्न सबैलाई आग्रह गरे। कांग्रेस धादिङले पार्टीको विशेष महाधिवेशन तथा पार्टी सुधार र रूपान्तरणका क्रममा चलेका बहस तथा गतिविधिलाई विचार-मन्थनको स्वाभाविक अभ्यासका रूपमा ग्रहण गर्दै त्यसबाट परिपक्व परिणाम निस्किएको विश्वास व्यक्त गरे।
अधिकारीद्वारा जारी विज्ञप्तिमा कांग्रेस नेपालको लोकतन्त्र, जनअधिकार, नागरिक स्वतन्त्रता, संवैधानिक सर्वोच्चता, विधिको शासन र उदार अर्थनीतिको संस्थापक तथा संरक्षक पार्टी भएको उल्लेख गरिएको छ। लोकतान्त्रिक राष्ट्रशक्तिका रूपमा कांग्रेसले आफूलाई जनभावनाअनुकूल विधिसम्मत र समयानुकूल रूपान्तरण गर्दै देश र जनताको हितमा समर्पित हुनुपर्ने दायित्व रहेको विज्ञप्तिमा जनाइएको छ।
यो पनि…
विज्ञप्तिमा भ्रष्टाचारको अन्त्य, सुशासन र अभिव्यक्ति स्वतन्त्रताको पक्षमा गत २३ भदौमा जेन-जी तथा नवयुवा पुस्ताले गरेको आन्दोलनको भावनालाई आत्मसात् गर्दै पार्टीभित्र नीति र नेतृत्व परिवर्तन, रूपान्तरण र सुधारको एजेन्डासहित विशेष महाधिवेशन सम्पन्न भएको उल्लेख छ। महाधिवेशनबाट नयाँ नीतिनिर्माण र नेतृत्व चयन भएको जनाउँदै जिल्ला कार्यसमितिले यसलाई सकारात्मक कदमका रूपमा लिएको छ।
विज्ञप्तिमा पार्टीका धादिङका क्रियाशील सदस्य, क्षेत्रीय प्रतिनिधि, पार्टी तथा भ्रातृ-शुभेच्छुक संस्थाका एकाइ, टोल तथा वडा कार्यसमिति, गाउँ/नगर कार्यसमिति, प्रदेश र जिल्ला तहका पदाधिकारी, महाधिवेशन प्रतिनिधि तथा प्रदेश अधिवेशन प्रतिनिधिलाई एकताबद्ध भएर पार्टी संगठन विस्तार, सुदृढीकरण र सक्रियताका साथ अगाडि बढ्न आह्वान गरिएको छ।
साथै आगामी २१ फागुनमा हुने प्रतिनिधिसभा सदस्य निर्वाचनमा पार्टी र पार्टीले तय गर्ने उम्मेदवारको पक्षमा जनताको बीचमा केन्द्रित हुन जिल्ला कार्यसमितिले अपिल गरेको छ।
