सर्लाही। नेपाली कांग्रेसका सभापति गगनकुमार थापाले सर्लाही निर्वाचन क्षेत्र नम्बर ४ लाई मधेस प्रदेशकै नमुना बनाउने बताएका छन्।

सर्लाहीको बरहथवा नगरपालिका ७ मा बजार विकाससम्बन्धी अन्तर्क्रियामा उनले आफूले निर्वाचन लडेको क्षेत्रलाई पाँच वर्षमा मधेस प्रदेशकै नमुना बनाएर देखाउने प्रतिबद्धता व्यक्त गरे। मधेसबाट चुनाव लड्ने निर्णय आफ्नो विकल्प नभइ चाहना भएको उनको भनाइ थियो। पहाड र सहर बुझेको आफूले तराई बुझ्नु अति आवश्यक रहेको उल्लेख गर्दै सभापति थापाले मधेस पढ्न आएको बताए।

सभापति थापाले सोमबारदेखि आफूले उम्मेदवारी दिएको सर्लाही ४, मा घरदैलो कार्यक्रम गरिरहेका छन्। देश विकास आजको आवश्यकता रहेको भन्दै उनले त्यसका लागि चाहिने स्रोत र जनशक्ति नेपालमा रहेकाले अब दृढ इच्छाशक्ति भएको कांग्रेस नेतृत्वमा रहन आवश्यक भएको बताए। जेन-जी आन्दोलनको जनादेशअनुसार पार्टीभित्रैबाट सङ्घर्ष गरेर पार्टीको नेतृत्व तयार भएको उनको भनाइ थियो। पार्टीमा जेन-जीको योगदान पुरानो रहेको उल्लेख गर्दै सभापति थापाले सहिद दुर्गानन्द झाको योगदानबारे चर्चा गरे।

“झाले १८/१९ वर्षको उमेरमा देश र पार्टीका लागि गरेको योगदान अमूल्य छ। गत २३ र २४ भदौको घटना नागरिकको कुरा नसुन्ने र देशमा व्याप्त भ्रष्टाचार तथा बेथिति विरुद्धको आन्दोलन थियो‚” सभापति थापाले भने।