कास्की। दक्षिण एसियाली खेलकुद महासङ्घ (साफ) यू-१९ महिला च्याम्पियनसिपको सबै तयारी पूरा भएको छ।

पोखरा रङ्गशालामा भोलि (शनिबार) देखि सुरु हुने प्रतियोगिताको उद्घाटन खेल बङ्गलादेश र भुटानबीच मध्याह्न १२ बजे हुनेछ। यसैगरी आयोजक नेपालले दिउँसो ३ बजे भारतसँग प्रतिस्पर्धा गर्नेछ। प्रतियोगिताका लागि सहभागी चारवटै देश तयार भएका छन्। नेपालसहित भारत‚ भुटान र बङ्गलादेशले उपाधिका लागि प्रतिस्पर्धा गर्ने आयोजक अखिल नेपाल फुटबल सङ्घले जनाएको छ।

पोखरामा आज (शुक्रबार) आयोजित ‘प्रिम्याच कन्फ्रेन्स’मा उपस्थित चारै देशका प्रशिक्षक र टोलीका कप्तानले टोलीका युवा खेलाडीबाट राम्रो खेलको अपेक्षा गरिएको र उपाधि जित्ने योजना रहेको सुनाए।

नेपाली यू-१९ महिला टोलीका मुख्य प्रशिक्षक सुमन श्रेष्ठले सकारात्मक नतिजाका लागि टोली प्रतिबद्ध रहेको बताए। “तयारी राम्रै भएको छ। घरेलु मैदान र समर्थकको साथ छ‚ पक्कै राम्रो रिजल्ट दिनेछौँ‚” श्रेष्ठले भने।

प्रतियोगितामा सहभागी चारवटै टोलीको उत्तिकै सम्भावना रहेकाले कुनै पनि टोली कमजोर नरहेको प्रशिक्षक श्रेष्ठले बताए। कप्तान सुशीला केसीले छोटो समयमा धेरै कुरा सिकेको बताइन्। उनले भनिन्‚ “घरेलु मैदानमा भएकाले राम्रो रिजल्ट ल्याउनेछौँ‚ छोटो समयमा धेरै सिकेका छौँ‚ सुधार भएको छ। राम्रो फुटबल खेल्नेछौँ।”

बङ्गलादेशका प्रशिक्षक बेटर बटलरले प्रतियोगिताले नयाँ खेलाडीहरुलाई अवसर र सिक्ने मौका प्रदान गरेको बताए। भारतकी प्रशिक्षक पामेला कोन्टीले युवा खेलाडीले राम्रो प्रदर्शन गर्नेमा आफू आशावादी रहेको बताइन्। युवा खेलाडी अत्यन्त उत्साहित रहेकाले उपाधि जित्ने लक्ष्य रहेको उनको भनाइ छ। नेपालसँगको खेल कठिन हुने प्रशिक्षक पामेलाले अनुमान गरिन्।

भुटानकी प्रशिक्षक टङ्कामाया घल्लीले युवा टोलीले अवसर पाएकाले राम्रो तयारी गरेर आएको बताइन्। उपाधिमा मात्र केन्द्रित नभई महिला टोलीको स्तर विकासमा ध्यान दिएको प्रशिक्षक घल्लीले बताइन्।

दक्षिण एसियाली फुटबल महासङ्घ (साफ) को समन्वय तथा अखिल नेपाल फुटबल महासङ्घ (एन्फा) को आयोजनामा हुने प्रतियोगिता ‘राउन्ड रोबिन लिग’ प्रणालीमा सञ्चालन हुनेछ। जहाँ प्रत्येक टोलीले अन्य टोलीसँग एक-एक खेल खेल्नेछ।

लिग चरणपछि शीर्ष दुई टोलीले २४ माघमा हुने फाइनल खेलमा उपाधिका लागि प्रतिस्पर्धा गर्नेछन्। प्रतियोगितालाई दर्शकको सहजताका लागि सामान्य प्यारापिटतर्फ २०० र भीआईपीतर्फ ५०० रुपैयाँको टिकटको व्यवस्था गरिएको एन्फाले जनाएको छ। प्रतियोगिता सम्पन्न गर्न करिब दुई करोड ४५ लाख १५ हजार २९० खर्च लाग्ने बताइएको छ।