काठमाडौँ। संघीय संसद् सचिवालयले संसद्को अधिवेशन आह्वान भएसँगै त्यसको तयारीका लागि सर्वदलीय बैठक बोलाएको छ।

संसद्मा प्रतिनिधित्व गरेका सबै दललाई भोलि बुधबार अपराह्न १ः०० बजे सर्वदलीय बैठकका निम्ति आमन्त्रण गरिएको संसद् सचिवालयका प्रवक्ता एकराम गिरीले जानकारी दिए।

राष्ट्रपति रामचन्द्र पौडेलले मन्त्रिपरिषद्को यही १६ चैतको सिफारिसअनुसार यही १९ चैत अपराह्न २ः०० बजे संघीय संसद्का दुबै सदनको अधिवेशन आह्वान गरेका छन्।

सोही अनुसार संसद्को पहिलो बैठक यही १९ चैत अपराह्न २ः०० बजे हुँदैछ। बैठकले सभामुख र उपसभामुखको निर्वाचन प्रक्रिया अगाडि बढाइने छ। प्रतिनिधिसभामा राष्ट्रिय मान्यता प्राप्त छ वटा राजनीतिक दलको सहभागिता छ।