जनकपुर। उच्च अदालत जनकपुरले जिल्ला अदालतको फैसला आंशिक रूपमा उल्टाउँदै केही अभियुक्तलाई कैद सजाय सुनाएको छ।

मधेस आन्दोलनका क्रममा सशस्त्र प्रहरीका असई थमन विकको हत्या प्रकरणमा प्रदेश सभा सदस्य अभिराम शर्मा र पूर्वसांसद लक्ष्मी महतो कोइरीलाई पाँच वर्ष कैद सजाय सुनाइएको हो। महतो नेकपा एमालेबाट निर्वाचित पूर्वसांसद हुन्। उनी महोत्तरी १ बाट निर्वाचित भएका थिए।

जिल्ला अदालत महोत्तरीले सफाइ दिएका लक्ष्मी महतो र पवन कापरलाई उच्च अदालतले जनही पाँच वर्ष कैद सजाय गरेको छ।

त्यसैगरी अभिराम शर्मा, सुरेन्द्र पाण्डे, धर्मेन्द्र राय र रामशंकर मिश्रलाई पनि पाँच वर्षकै कैद सजाय सुनाइएको छ। प्रदीप माझी, सञ्जय साह र मोहन ठाकुरको हकमा भने जिल्ला अदालतको फैसला नै सदर गरिएको छ।

उच्च अदालत जनकपुरका मुख्य न्यायाधीश टेकनारायण कुँवर र न्यायाधीश मुरारीबाबु श्रेष्ठको संयुक्त इजलासले बुधबार यस्तो फैसला सुनाएको हो।