काठमाडौँ । इरानको इस्लामिक रिभोलुसनरी गार्ड कोर्प्स (आईआरजीसी)ले अनधिकृत मार्ग प्रयोग गरी होर्मुज जलघाँटी पार गर्ने प्रयास गरेको एक जहाजमाथि चेतावनीस्वरूप गोली चलाएको जनाएको छ। घटनापछि जलघाँटी अर्को सूचना नभएसम्मका लागि बन्द गरिएको घोषणा गरिएको छ।

आइतबार बिहान स्थानीय समयअनुसार आईआरजीसीको नौसैनिक शाखाले जारी गरेको विज्ञप्ति, जसलाई आईआरजीसीसँग निकट मानिने अर्धसरकारी तस्निम समाचार एजेन्सीको अरबी संस्करणले सार्वजनिक गरेको हो, त्यसमा विदेशी शक्तिहरूको हस्तक्षेपका कारण क्षेत्रीय सुरक्षा अवस्था थप संवेदनशील बनेको आरोप लगाइएको छ।

विज्ञप्तिअनुसार केही जहाजहरूले ‘अनधिकृत मार्ग’ प्रयोग गर्दै जलघाँटी पार गर्ने प्रयास गरेका थिए। तीमध्ये एक जहाजलाई रोक्न चेतावनीस्वरूप गोली चलाइएको आईआरजीसीले जनाएको छ।

आईआरजीसीले बाह्य पक्षहरूको गैरकानुनी हस्तक्षेपका कारण उत्पन्न परिस्थितिलाई ध्यानमा राख्दै होर्मुज जलघाँटी अर्को सूचना नभएसम्म तथा अमेरिकाको क्षेत्रीय हस्तक्षेप अन्त्य नभएसम्म कुनै पनि जहाज वा नौसैनिक साधनलाई उक्त जलमार्ग प्रयोग गर्न अनुमति नदिइने स्पष्ट पारेको छ।

यसैबीच, अमेरिकी राष्ट्रपति डोनाल्ड ट्रम्पले शुक्रबार अमेरिका–इरानबीच युद्धविरामसम्बन्धी वार्ता जारी रहने संकेत दिएका थिए। उनले युद्धविराम कायम रहे पनि आवश्यक परे इरानमाथिको अमेरिकी सैन्य कारबाहीसँगै वार्ताको प्रक्रिया अघि बढ्न सक्ने धारणा व्यक्त गरेका थिए।