काठमाडौँ। कृषि, वन तथा पर्यावरण मन्त्रालयले पशु सेवा विभागका वरिष्ठ पशुचिकित्सक डा. नवीन उपाध्याय घिमिरेविरुद्ध विभागीय कारबाही प्रक्रिया टुंग्याउँदै निजामती सेवाबाट हटाउने निर्णय गरेको छ।

मन्त्रालयका अनुसार निजामती सेवा ऐन २०४९ बमोजिम विभागीय सजायसम्बन्धी प्रक्रिया पूरा गरी यसअघि लोकसेवा आयोगको परामर्श मागिएको थियो। आयोगबाट प्राप्त परामर्शका आधारमा निजामती सेवा ऐन, २०४९ को दफा ५९ को खण्ड (ख) बमोजिम भविष्यमा सरकारी सेवाका लागि अयोग्य नठहरिने गरी सेवाबाट हटाउने विभागीय सजाय लागु गर्ने निर्णय गरिएको हो।

मन्त्रालयका अनुसार सम्बन्धित कर्मचारीविरुद्ध आवश्यक विभागीय कारबाही सम्पन्न गरी सोको जानकारी लोकसेवा आयोगलाई गराइने जनाइएको छ।

यसैबीच मन्त्रालयका अनुसार यस्तै प्रकृतिका मुद्दामा थप १४ कर्मचारीविरुद्ध विभागीय कारबाही प्रक्रिया अघि बढिरहेको र कानुनी प्रक्रिया पूरा भएपछि आवश्यक निर्णय गरिने तयारी छ।