काठमाडौँ। उत्साहप्रद प्रतिक्रियासहित चलचित्र ‘गौँथली’ प्रदर्शनको दोस्रो साता प्रवेश गरेको छ। गत शुक्रबार रिलिज भएको चलचित्रले सकारात्मक प्रतिक्रिया पाउँदा शोहरू पनि बढिरहेको निर्माणपक्षले दाबी गरेको छ।

चलचित्रको व्यापार पनि उत्साहप्रद छ। तर बक्सअफिस रिपोर्ट भने निर्माण टिमले सार्वजनिक गरेको छैन। “हरेक सोमबार चलचित्र विकास बोर्डले नै बक्सअफिस डाटा सार्वजनिक गर्दै आएको छ। त्यसैले हामीले सोमबार आधिकारिक रूपमा बोर्डले नै सार्वजनिक गरिहाल्छ भनेर बाहिर नल्याएका हौँ,” निर्देशक कपिल रिजालले भने, “तर बक्सअफिस रिपोर्ट सप्राइजिङ आउँदै छ।”

पहिलो दिन औसत देखिएको हलमा त्यसपछिका दिनमा अकुपेन्सी बढेर हाउसफुलसम्म हुँदै आएको छ। कलाकारसहितको टिम हलहलमा पुगेर दर्शकको प्रतिक्रिया बुझिरहेको छ। काठमाडौँ उपत्यकासहित कलाकारहरू मोफसलका हल पुगेर दर्शकलाई भेटिरहेका छन्। दर्शकले मौलिका सिनेमा भन्दै चलचित्रको तारिफ गरिरहेका छन्।

चलचित्र ‘गौँथली’मा अरुण क्षेत्री, सिम्रन खड्का, मदनकृष्ण श्रेष्ठ, प्रकाश घिमिरे, लुनिभा तुलाधर, रवीन्द्र झा, ईश्वरी बराल, सञ्जोग रसाइली, सीतादेवी तिमिल्सिना, लक्ष्मीनाथ तिमिल्सिनालगायत कलाकारको अभिनय छ।

भोला रिजालको कथामा आधारित चलचित्रको पटकथा तथा संवाद कपिल रिजाल, निश्चल कुँवर, नीरज नेपाल र गिरिराज घिमिरेले संयुक्त रूपमा तयार गरेका हुन्।

घर, परिवार, सम्बन्ध र आत्मीयताको भावलाई केन्द्रमा राखिएको चलचित्रको वितरण रिच इन्टरटेनमेन्ट, एप्पल इन्टरटेनमेन्ट र एफडीले गरेका छन्।