नेपालगन्ज। नेपालगन्ज उपमहानगरपालिकामा आज एकैदिन ६ वटा शालिक अनावरण गरिएको छ।
नेपालगन्ज उपमहानगरपालिकाका प्रमुख प्रशान्त विष्टले जेन-जी आन्दोलनका क्रममा तोडफोड गरिएका ती ऐतिहासिक शालिकको अनावरण गरेका हुन्।
पूर्वप्रधानमन्त्री सुशील कोइरालाको शालिकसँगै गणेशमान सिंह, बीपी कोइराला, पुष्पलाल श्रेष्ठ, तत्कालीन राजा वीरेन्द्र शाह तथा सहिद सेतु विकका पुनर्निर्माण गरिएका शालिक नेपालगन्जका अलगअलग स्थानमा पुनः स्थापित भएका हुन्।
अनावरण कार्यक्रममा नगरप्रमुख विष्टले इतिहासको सम्मानका साथै ऐतिहासिक व्यक्तित्वको योगदानलाई स्मरण गर्दै नयाँ पुस्तालाई इतिहासप्रति सचेत गराउने उद्देश्यले शालिक पुनर्निर्माण गरिएको बताए। उनले भने, “यी हाम्रा धरोहर हुन् जसले इतिहासलाई जीवन्त राख्नेछन्।”
अनावरण कार्यक्रममा जिल्लाका विभिन्न राजनीतिक दलका नेताकार्यकर्ताको सहभागिता थियो। पूर्वप्रधानमन्त्री सुशील कोइरालाका बाहेक अन्य पाँच शालिक निर्माणमा करिब २५ लाख रुपैयाँ खर्च भएको नेपालगन्ज उपमहानगरपालिकाले जनाएको छ।
