पाल्पा। कमल राष्ट्रिय सुकर्म पुरस्कार (२०८२) पाल्पाका शिक्षाविद् दिलबहादुर शाक्यलाई प्रदान गरिएको छ।

शिक्षा स्वास्थ्य तथा साहित्य प्रतिष्ठान नेपालद्वारा कमलराज रेग्मीका नाममा स्थापित पुरस्कार शाक्यलाई प्रदान गरिएको हो।

उनलाई ५१ हजार रुपैयाँ नगद, दोसल्ला र सम्मानपत्रले पुरस्कृत गरिएको छ। प्रतिष्ठानका संरक्षक वरिष्ठ मुटुरोग विशेषज्ञ डा. प्रकाशराज रेग्मीले पुरस्कार स्थापना गरेका हुन्।

यो पुरस्कारबाट अहिलेसम्म साहित्यकार झपेन्द्र जीसी, वैधराज विश्वमान बज्राचार्य, समाजसेवी राधा भारती, कलाकार अशोक आर्ट, शिक्षाविद् बुद्धिप्रसाद शर्मा, युनाइटेड मिसन अस्पतालका प्रमुख डा. रचेल कारख र साहित्यकार मोहन दुवाललाई पुरस्कृत गरिसकिएको प्रतिष्ठानका अध्यक्ष पुष्करराज रेग्मीले बताए।

पाल्पाको इतिहासमा शिक्षा साहित्य र राजनीतिको क्षेत्रमा दिवंगत कमलराज रेग्मीको योगदान अमूल्य रहेको अध्यक्ष रेग्मीले बताए। उनले भने‚ “उहाँ २००७ सालको क्रान्तिका कमान्डर हुनुहुन्थ्यो। उहाँका नाममा यहाँ पुरस्कार स्थापना हुनु पाल्पाका लागि गौरवको विषय हो।”