काठमाडौँ। नेपाली कांग्रेसका सभापति शेरबहादुर देउवासँग पार्टीका नेता शेखर कोइरालाले भेट गरेका छन्।

सभापति देउवानिवासमा आज (मंगलबार) भएको भेटमा पार्टीको १५औँ महाधिवेशनबारे छलफल भएको कोइरालाको स्वकीय सचिव दिनेशचन्द्र थपलियाले जानकारी दिए।

भेटमा कोइरालाले क्रियाशील सदस्य वितरण समितिले नम्बरविनाका फाराम जिल्ला-जिल्ला पठाएकाले यसले पार्टीभित्र जटिल समस्या उत्पन्न सिर्जना गरेको देउवालाई बताएका थिए। उनले नम्बरविनाका फाराम तत्काल फिर्ता गरी नयाँ फाराम पठाउनसमेत सभापतिको ध्यानाकर्षण गराए।

पार्टीभित्र कारबाहीमा परेका नेताको कारबाही फुकुवा गरी पार्टीको महाधिवेशन र आमनिर्वाचनमा खटाउन कोइरालाले आग्रह गरे। भेटमा कोइरालासँगै पार्टीका नेता एवं पूर्वमन्त्री मीनेन्द्र रिजाल पनि देउवानिवास पुगेका थिए।