काठमाडौँ। युक्रेनको राजधानी किएभमा रुसी ड्रोन आक्रमणमा दुईजनाको मृत्यु भएको छ।

किएभको आपतकालीन सेवाहरूले रुसी आक्रमणमा दुई महिलाको मृत्यु भएको र अन्य पाँचजना घाइते भएको बताएका छन्।

किएभ प्रशासनले सहरका चार क्षेत्रमा राहत र उद्धार कार्य भइरहेको बताएको छ। गएराति भएको आक्रमणमा आवासीय र औद्योगिक क्षेत्रहरूमा उल्लेखनीय क्षति पुगेको छ।

एक छुट्टै विज्ञप्तिमा किएभ प्रहरीले ७१ वर्षीय पुरुषको पनि मृत्यु भएको र कम्तिमा ३२ जना घाइते भएको बताएको बीबीसीले समाचारमा उल्लेख गरेको छ।

राष्ट्रपति ट्रम्पलाई भेट्न जानुअघि युक्रेनी राष्ट्रपति जेलेन्स्कीले विश्व नेताहरू युक्रेन र रुस बीचको युद्ध अन्त्य गर्न केन्द्रित रहेको बताएका छन्। तर युक्रेनलाई अझै पनि मद्दतको आवश्यकता रहेको बताएका छन्।

उनले चेतावनी दिए‚ “हवाई रक्षाका लागि आपूर्ति पर्याप्त र समयमै हुनुपर्छ‚ विशेषगरी अहिले जब हामीलाई तिनीहरूको सबैभन्दा बढी आवश्यकता छ। जीवन बचाउन ढिलाइ हुनु हुँदैन।”

युक्रेनका राष्ट्रपति भ्लोदमिर जेलेन्स्कीले भने‚ “रक्षाबिनाको कूटनीतिले काम गर्दैन।”

उनले भने कि हिजो राति भएका आक्रमणहरूले पुटिन र उनका नजिकका सहयोगीहरूको वास्तविक मानसिकता प्रकट गर्दछ।

रुसी रक्षा मन्त्रालयले सामाजिक सञ्जाल पोस्टमा युक्रेनी सैन्य अड्डाहरूलाई लक्षित गरी ठूलो आक्रमण गरेको र तोकिएका सबै लक्ष्यहरूलाई सफलतापूर्वक प्रहार गरेको बताएको छ।

रक्षा मन्त्रालयले आक्रमणमा ‘लामो दूरीका‚ जमिन‚ वायु र समुद्रमा आधारित सटिक हतियारहरू’ प्रयोग गरेको बताएको छ। -बीबीसी