काठमाडौँ । नेकपा एमालेका उपमहासचिव योगेश भट्टराईले ११औँ महाधिवेशनमा आफूहरूले उठाएका मुद्दा चाँडै पार्टी-पंक्तिबाट ‘अनुमोदन’ हुने बताएका छन्।

आफूहरूले पार्टीमा राखेका प्रस्तावले राजनीतिक वृत्त, सञ्चार जगत्, बुद्धिजीवी तथा आम जनसमुदायकै ध्यानाकर्षण भएको उल्लेख गर्दै उनले आगामी दिनमा पनि यो बहस निरन्तर जारी रहने दाबी गरे ।

‘हामीले उपरोक्त कार्यभार पूरा गर्न नेकपा एमालेको ११औँ महाधिवेशनमा पार्टीको बहु आयामिक पुनर्गठन र नेतृत्व हस्तान्तरणको विषय अघि सारेका थियौँ’, एमाले उपमहासचिव भट्टराईले बुधबार बिहान सामाजिक सञ्जालमार्फत भनेका छन्, ‘हामीले पार्टीको अन्तर-संघर्षमा आश र त्रासबाट मुक्त भएर यो जोखिम उठाएका हौँ। म पार्टीका सम्पूर्ण कमरेडहरूलाई विचलित नहुन र आफ्ना तर्फबाट पार्टी एकताका पक्षमा भूमिका निर्वाह गर्न अनुरोध गर्दछु। हामीले उठाएका मुद्दाले जनताको दिलबाट समर्थन प्राप्त गरेको छ र निकट भविष्यमै पार्टी(पंक्तिबाट पनि अनुमोदन हुनेछन्।’