काठमाडौँ। अर्थमन्त्री रामेश्वरप्रसाद खनालसँग नेपालका लागि कोरिया राजदूत पार्क ते यङले शिष्टाचार भेट गरेका छन्। अर्थ मन्त्रालयमा आज (सोमबार) भएको भेटमा अर्थमन्त्री खनालले कोरिया र नेपालबीच रहेको दुईपक्षीय कूटनीतिक सम्बन्धको चर्चा गर्दै कोरिया सरकारले प्रदान गर्दै आएको निरन्तर सहयोगका लागि धन्यवाद जनाए।

कोरियाको सहयोगमा सञ्चालन भएका आयोजना तथा कार्यक्रमहरूको अवस्था सन्तोषजनक रहेको उल्लेख गर्दै खनालले कोरियासँगको आर्थिक साझेदारीलाई निरन्तरता दिइने बताए।

भेटमा राजदूत पार्कले कोरिया सरकारको एजेन्सी कोइका र नेपाल सरकारबीचको द्विपक्षीय सम्बन्ध स्थापनाको ३० वर्ष पुगेको स्मरण गर्दै आगामी दिनमा थप समन्वय र सहकार्यका आशा व्यक्त गरे।

कोरियन लगानीकर्तालाई नेपालमा लगानीको लागि प्रोत्साहित गर्न र नेपाली उत्पादन प्रवर्द्धनका लागि आवश्यक सहजीकरण गरिने उनले आश्वासन पनि दिए। नेपाली कामदारलाई रोजगारीका लागि कोरिया लैजान सहज होस् भनेर कोरिया सरकारले छुट्टै भिसा सेन्टर स्थापना गर्न लागेको पनि जानकारी गराए।

त्यसैगरी उनले ईपीएस प्रणालीअन्तर्गत रोजगारीका लागि कोरिया गई फर्किएका नेपाली नागरिकको उद्यमशीलता प्रवर्द्धनका लागि नयाँ व्यवसाय सञ्चालन गर्न कोइकाको सहयोगमा कृषि विकास बैंकमार्फत सहुलियतपूर्ण कर्जा उपलब्ध गराउन प्रक्रिया अगाडि बढाइएको बताए। त्यसका लागि आवश्यक सहजीकरण गर्नसमेत अनुरोध गरेको अर्थमन्त्री मन्त्रालयका सहसचिव टंकप्रसाद पाण्डेले जनाए।