इलाम। मेची राजमार्गअन्तर्गत इलाम नगरपालिका ९‚ भञ्ज्याङमा ट्रक र स्कुटर ठोक्किएर भएको दुर्घटनामा दुईजनाको मृत्यु भएको छ।

झापाबाट इलामतर्फ आउँदै गरेको प्रदेश १-०१-००१ ख ४१०१ नम्बरको ट्रक र विपरीत दिशातर्फ जाँदै गरेको प्रदेश १-०१-०१२ प ४८९९ नम्बरको स्कुटर आज (शनिबार) दिउँसो दुर्घटना हुँदा स्कुटरमा यात्रारत दुईजनाको मृत्यु भएको हो।

मृत्यु् हुनेमा इलाम नगरपालिका ९‚ गोलबस्तीका २६ वर्षीय डेबिट थापा मगर र माईजोगमाई गाउँपालिका नयाँबजार घर भई हाल इलाम ७‚ चोकबजारमा बस्ने १९ वर्षीय छेवाङ शेर्पा रहेका जिल्ला प्रहरी कार्यालयले जनाएको छ।

कार्यालयका सूचना अधिकारी एवं प्रहरी नायब उपरीक्षक लक्ष्मी भण्डारीका अनुसार दुर्घटनालगत्तै उपचारका लागि जिल्ला अस्पताल लगिएकामा चिकित्सकले दुवै जनालाई मृत घोषणा गरेका थिए। ट्रक चालक इलाम ५‚ बिब्ल्याटेका २५ वर्षीय रामप्रसाद श्रेष्ठलाई नियन्त्रण लिई अनुसन्धान भइरहेको प्रहरीले जनाएको छ।