पोखरा । आहा रारा पोखरा गोल्डकप फुटबल प्रतियोगितामा आज दोस्रो सेमिफाइनलको खेल हुँदैछ ।

दोस्रो सेमिफाइनल अन्तर्गत आज विदेशी टोली आभा एफसी उज्वेकिस्तान र जावलाखेल युथ क्लबबीच प्रतिस्पर्धा हुँदैछ । खेल अपराह्न पोखरा रङ्गशालामा हुनेछ ।

आभा एफसी क्वार्टरफाइनलमा प्लानिङ ब्वाइज युनाइटेडलाई हराएर सेमिफाइनलमा पुगेको हो भने अपी चर्च ब्वाइज युनाइटेडलाई पराजित गर्दै जावलाखेलले सेमिफाइनल यात्रा सुरक्षित गरेको थियो ।

यो खेलको विजेताले आयोजक सहारा क्लब पोखरासँग फाइनल खेल खेल्नेछ । प्रतियोगिताको फाइनल खेल आगामी शनिबार हुनेछ।

बुधबार भएको पहिलो सेमिफाइनलमा ६ पटकको उपाधि विजेता मनाङ मर्स्याङ्दी क्लबलाई सडन डेथमा हराउँदै आयोजक सहारा क्लब उपाधि नजिक पुगेको छ ।

प्रतियोगिताको उपाधि विजेताले १४ लाख १ हजार र उपविजेताले ७ लाख १ हजार रुपैयाँ नगदसहित शिल्ड, मेडल र प्रमाणपत्र प्राप्त गर्नेछन्।