भक्तपुर। आज १५ असार, लोकल उत्पादनका रूपमा प्रख्यात भक्तपुरको ताइचिन चिउरा एकै दिन ४० टन बिक्री भएको छ।

काठमाडौँ उपत्यकाभित्रका तीन जिल्लाका विभिन्न सहर र काभ्रेमा १५ असारका लागि यहाँका चिउरा व्यवसायीले ४० टन ताइचिन चिउरा बिक्री गरेको चिउरा व्यवसायी एवं भक्तपुर घरेलु तथा साना उद्योग संघका निवर्तमान अध्यक्ष वीरेन्द्र जतिले जानकारी दिए।

उनले आजको दिन ताइचिन चिउराको माग अत्यधिक बढेको बताए। दहीसँग ताइचिन चिउरा निकै स्वादिलो हुने मान्यताअनुरूप वर्षौंदेखि चिउराका पारखीले ताइचिन चिउरानै रोज्ने गर्छन्।

भक्तपुरमा करिब २५ वटा चिउरा मिलबाट दैनिक २५ टन ताइचिन चिउरा उत्पादन हुने गरेको उनले जानकारी दिए। भक्तपुर नगरपालिका ६‚ भालाछेँमा लक्ष्मी चिउरा उद्योगको नामले प्रख्यात जतिको उक्त चिउरा उद्योगमा मात्रै दैनिक ८०० किलो ताइचिन चिउरा बिक्री हुने गरेको उनी बताउँछन्।

दही चिउरा खाने दिन काठमाडौँ उपत्यकाका व्यापारी तथा रेस्टुरेन्टहरूमा ताइचिन चिउराको माग अत्यधिक बढेको उनले बताए। आज मात्रै आफ्नो चिउरा मिलबाट एक हजार किलो चिउरा माग भएकामा ८०० किलो मात्रै दिन सकेको संघका निवर्तमान अध्यक्ष जति बताउँछन्। भक्तपुरबाट प्रतिकिलो २५० रुपैयाँमा ताइचिन चिउरा बिक्री हुँदै आएको छ।

खानलाई स्वादिलो र स्वस्थ्यवर्द्धक हुने भएकाले दहीसँग ताइचिन चिउरा खाने प्रचलन रहेको उनी बताउँछन्। उनका अनुसार भक्तपुरबाट वार्षिक ३०० टन ताइचिन चिउरा काठमाडौँ उपत्यकामा बिक्री हुने गरेको छ।

चिउराका लागि चैतेधानको साथै चितवन, नुवाकोट, पनौती, नाला, भक्तपुरबाट सिजनअनुसार धान आयात गरेर चिउरा उत्पादन गर्ने गरेको संघका पूर्वअध्यक्ष जति बताउँछन्। -रासस