काठमाडौँ। नेपाली कांग्रेसले पार्टीका बारा जिल्ला सभापति राजेश राय यादवलाई निलम्बन गर्ने निर्णय गरेको छ।

पार्टी कार्यालय सानेपामा बिहीबार बसेको कांग्रेस अनुशासन समितिको बैठकले प्रतिनिधिसभा सदस्य निर्वाचनमा पार्टीको आधिकारिक उम्मेदवारलाई निर्वाचनमा हराउन लागेको भन्ने उजुरीका आधारमा स्पष्टीकरण माग गर्दा कुनै जवाफ नदिएको भन्दै अनुशासन उल्लघंन गरेको कसुरमा अन्तिम निर्णय नहुन्जेलसम्मका लागि कामकाज गर्न नपाउने गरी निलम्बन गर्ने निर्णय गरेको हो।

बैठकले प्रतिनिधिसभा सदस्यको निर्वाचनमा पार्टीको उम्मेदवारलाई असहयोग गरेको उजुरी सम्बन्धमा छानबिनपछि सर्लाहीका प्रदेश सभा सदस्यहरू शकुन्तीदेवी महरा, कौशलकिशोर राय र जंगीलाल रायलाई आगामी दिनमा गुनासो नआउने गरी सजगताका साथ पार्टीको विधान, नियमावलीप्रति पूर्ण प्रतिबद्ध रही दत्तचित्तका साथ पदीय जिम्मेवारीअनुरूप कार्य गर्न निर्देशन दिएको छ।

त्यस्तै बैठकले बारा जिल्ला कार्यसमिति उपसभापति अमिरीलाल राउत (पाल) माथिको उजुरीका सम्बन्धमा स्पष्टीकरण सोध्दा सन्तोषजनक जवाफ आएकाले थप कारबाही गर्नुपर्ने अवस्था नदेखिएकाले निजमाथि लगाइएको आरोपबाट सफाइ पाउने ठहर गरेको अनुशासन समिति संयोजक तारामान गुरुङले जानकारी दिए।