काठमाडौँ। राष्ट्रिय स्वतन्त्र पार्टी (रास्वपा) ले प्रथम राष्ट्रिय महाधिवेशनको तयारी स्वरूप सुरु गरेको जिल्ला अधिवेशन ५६ जिल्लामा सम्पन्न गरेको छ।

देशभरका बाँकी जिल्लाहरूमा विविध कारणवश रोकिएको निर्वाचन प्रक्रिया अगाडि बढाउने तयारी भइरहेको रास्वपाले जनाएको छ।

रास्वपा केन्द्रीय निर्वाचन विभागका प्रमुख भुवन केसीका अनुसार १२ जिल्लामा निर्वाचन प्रक्रिया जारी छ भने केही जिल्लामा प्राविधिक कारणले अधिवेशन सुरु हुन बाँकी छ।

रास्वपाले महाधिवेशनको तयारी स्वरूप जेठ २३ देखि देशभर जिल्ला अधिवेशन सुरु गरेको थियो। पार्टीको केन्द्रीय कार्यतालिका अनुसार जिल्ला अधिवेशन सकिएलगत्तै मंगलबारदेखि सातै प्रदेशमा प्रदेश अधिवेशन सुरु हुँदै छ।

रास्वपा प्रवक्ता मनीष झाका अनुसार सम्पन्न भएका ५६ जिल्ला अधिवेशनबाट अधिकांशमा नयाँ नेतृत्व चयन भइसकेको छ भने केहीमा निर्वाचन प्रक्रिया अन्तिम चरणमा पुगेको छ।

मधेस प्रदेशका अधिकांश जिल्लामा नेतृत्व चयनका लागि मतदान प्रक्रिया चलिरहेको उनले जानकारी दिए।

हालसम्म कोशी प्रदेशका झापा, मोरङ, सुनसरी, इलाम, तेह्रथुम, धनकुटा, भोजपुर, संखुवासभा, पाँचथर, ताप्लेजुङ, सोलुखुम्बु, खोटाङ र ओखलढुंगामा अधिवेशन सम्पन्न भएको छ भने उदयपुरमा निर्वाचन प्रक्रिया जारी छ।

त्यसैगरी मधेसका महोत्तरी, रौतहट, सिराहा, पर्सा र सर्लाहीमा निर्वाचन सम्पन्न भएको छ । धनुषा, सप्तरी र बारामा मतदानको कार्यतालिका तय गरिएको छ।

बागमती प्रदेशका काठमाडौँ, भक्तपुर, काभ्रेपलाञ्चोक, नुवाकोट, मकवानपुर, दोलखा, सिन्धुली, धादिङ, रामेछाप, चितवन, रसुवा र ललितपुरमा अधिवेशन सम्पन्न भएको छ। सिन्धुपाल्चोकको अधिवेशन भने स्थगित गरिएको छ।

गण्डकीका स्याङ्जा, कास्की, पर्वत, लमजुङ, म्याग्दी, तनहुँ, गोरखा र बाग्लुङमा अधिवेशन सम्पन्न भएका छन्। बाग्लुङ र नवलपुरमा भने निर्वाचन प्रक्रिया सुरु हुन बाँकी छ।

लुम्बिनी प्रदेशका गुल्मी, नवलपरासी (पश्चिम), पाल्पा, कपिलवस्तु, दाङ, प्युठान, बाँके, बर्दिया, रोल्पा, अर्घाखाँची र रुपन्देहीसहित सबै जिल्लामा अधिवेशन सम्पन्न भएको रास्वपाले जनाएको छ। लुम्बिनी सबै जिल्ला अधिवेशन सक्ने पहिलो प्रदेश बनेको छ।

कर्णालीका कालिकोट, सल्यान, रुकुम पश्चिम, मुगु र जुम्लामा अधिवेशन सम्पन्न भइसकेको छ। सुर्खेत, जाजरकोट र दैलेखमा निर्वाचन प्रक्रिया जारी छ भने डोल्पा, हुम्ला र रुकुम पूर्वमा अधिवेशन हुन बाँकी छ।

सुदूरपश्चिम प्रदेशका बैतडी, डडेलधुरा, अछाम, दार्चुला, कैलाली र कञ्चनपुरमा अधिवेशन सम्पन्न भएको छ। डोटी र बाजुरामा पुनः निर्वाचन हुने भएको छ । हिमाली जिल्ला मनाङ र मुस्ताङमा भने हालसम्म जिल्ला अधिवेशन हुन सकेको छैन।

रास्वपाले वडा र पालिका तहको अधिवेशन सम्पन्न गरिसकेपछि जिल्ला अधिवेशनमार्फत संगठन सुदृढीकरण अभियानलाई तीव्रता दिएको हो। पार्टीको प्रथम ऐतिहासिक महाधिवेशन आगामी असार ६ र ७ गते चितवनमा हुने तय भइसकेको छ।