काठमाडौँ। बजारमा लेबल नभएका, न्यून गुणस्तर भएका, मिसावटयुक्त तथा चोरी पैठारी गरिएका सामान बिक्री-वितरण भइरहेको भन्दै सरकारले कारबाहीको चेतावनी दिएको छ।

उद्योग, वाणिज्य तथा आपूर्ति मन्त्रालय मातहतको वाणिज्य, आपूर्ति तथा उपभोक्ता संरक्षण विभागले चालु आव ०८३/८४ को सूचना नम्बर ०३/०८३-८४ जारी गर्दै गैरकानुनी व्यापारिक गतिविधिमा संलग्नलाई कारबाही गरिने स्पष्ट पारेको हो।

विभिन्न भौतिक बजारका साथै डिजिटल (अनलाइन) प्लेटफर्मका माध्यमबाट समेत दैनिक उपभोगका अत्यावश्यक खाद्य, पेय पदार्थ र लत्ताकपडा अवैध रूपमा बिक्री भइरहेको भनी प्राप्त उजुरी र जनगुनासोप्रति मन्त्रालय र विभागले गम्भीर ध्यानाकर्षण भएको जनाएका छन्।

विभागद्वारा जारी सूचनामा उपभोक्ता संरक्षण ऐन, २०७५ एवं नियमावली २०७६ बमोजिम उपभोक्ताले गुणस्तरीय वस्तु तथा सेवा प्राप्त गर्ने अधिकार सुनिश्चित गरिएको स्मरण गराइएको छ। कानुनविपरीत गरिने मिसावट, चोरी पैठारी र कम गुणस्तरका सामान बिक्री गर्नेजस्ता कार्य पूर्ण रूपमा दण्डनीय र अक्षम्य रहेको पनि सूचनामा उल्लेख छ।

उद्योग, वाणिज्य तथा आपूर्ति मन्त्रालयको बजार स्वच्छता कायम गर्ने नीतिअनुरूप विभागले उत्पादन, पैठारी, ढुवानी, सञ्चय र बिक्री वितरणमा संलग्न सबै व्यवसायीलाई कानुनले तोकेबमोजिमको दायित्व, सर्त र बन्देज पूर्ण रूपमा पालना गर्न निर्देशन दिएको छ।

मन्त्रालय र विभागले बजार अनुगमनलाई थप तीव्र बनाउने र कानुनको उल्लंघन गरी उपभोक्ताको स्वास्थ्य एवं अधिकारमाथि खेलबाड गर्ने जुनसुकै व्यवसायीलाई पनि कानुनबमोजिम हदैसम्मको कडा कारबाही गरिने चेतावनी दिएको छ।