काठमाडौँ। काठमाडौँको तापक्रम आज (मंगलबार) यो वर्षकै सबैभन्दा कम मापन गरिएको छ। जल तथा मौसम विज्ञान विभागका अनुसार आज काठमाडौँको न्यूनतम तापक्रम ४.८ डिग्री रेकर्ड भएको छ।

यो तापक्रम वर्षकै सबैभन्दा कम हो। यसअघि यही ८ पुसमा काठमाडौँको न्यूनतम तापक्रम ४.९ डिग्री मापन भएको थियो। त्यसपछिको कम तापक्रम आज मापन भएको हो।

जल तथा मौसम विज्ञान विभागका सूचना अधिकारी दिनकर कायस्थले तराई क्षेत्रमा हुस्सु, कुहिरो र शीतलहर कायम रहेको र हिमाली क्षेत्रमा केही ठाउँमा हिमपात रहेको बताए। चिसो अझै बढ्ने अनुमान गरिएको छ। आज जुम्लाको तापक्रम माइनस ४.५ डिग्री छ।

विभागले आज (मंगलबार) राति सार्वजनिक गरेको बुलेटिनमा १६ पुसमा तराई भू–भागका अधिकांश स्थानहरूमा हुस्सु/कुहिरो रहने तथा कर्णाली प्रदेश र सुदूरपश्चिम प्रदेशलगायत बाँकी पहाडी तथा हिमाली भू-भागमा आंशिक बदली रहने जनाइएको छ।

कोसी, गण्डकी र कर्णाली प्रदेशका उच्च पहाडी तथा हिमाली भू-भागका एक-दुई स्थानमा हल्का वर्षा/हिमपातको सम्भावना रहेको पनि विभागले जनाएको छ। यही १७ पुसमा पनि उस्तै अवस्था रहने भएकाले आवश्यक सावधानी अपनाउन महाशाखाले सर्वसाधारणमा अनुरोध गरेको छ।

देशका तराई भू-भागमा हुस्सु/कुहिरोको प्रभावले दैनिक जनजीवन, स्वास्थ्य, सडक तथा हवाई यातायातमा आंशिक प्रभाव पर्ने देखिएको छ।