काठमाडौँ। मुलुकका अधिकांश स्थानमा मंगलबार साँझदेखि सक्रिय भएर वर्षा गराएको पश्चिमी न्यूनचापीय प्रणाली अहिले साँझदेखि बाहिरिएको छ।

जल तथा मौसम विज्ञान विभागका वरिष्ठ मौसमविद् वरुण पौडेलले उक्त प्रणाली बाहिरिएको र पश्चिमी वायुको प्रभाव कायम रहेकाले कतैकतै उच्च पहाडी तथा हिमाली क्षेत्रमा सामान्य असर देखिने भए पनि भोलिदेखि मौसम खुल्ने बताए। उनले चिसो भने केही दिन रहनसक्ने बताउँदै अब अर्को प्रणाली नआएसम्मलाई मौसम खुल्ने जानकारी दिए।

उक्त प्रणालीले आज (बुधबार) काठमाडौँ उपत्यकासहित देशका धेरै ठाउँमा वर्षा गराएको छ। विशेषगरी यो प्रणालीले मधेस र कोसी प्रदेशलाई सामान्यभन्दा छुन सकेन।

उक्त प्रणालीले काठमाडौँमा २.२‚ ललितपुर र भक्तपुरमा समान ४.८ मिलिमिटर वर्षा गराएको छ। पछिल्लो चौबीस घण्टामा सबैभन्दा बढी सुर्खेतमा ४३ मिलिमिटर वर्षा भएको छ।

हिमपातले रुकुम पूर्वको जनजीवन प्रभावित

रुकुमको शेरागाउँमा ३८ मिलिमिटर र जाजरकोटमा ३३ मिलिमिटर‚ बैतडीमा ३५.६‚ डडेलधुरामा ३३.२‚ बाजुरमा ३०.२‚ मनाङमा ३२.४ र डोल्पामा ३१ मिलिमिटर वर्षा भएको छ। नेपालको पश्चिम क्षेत्रका उच्च पहाडी तथा हिमाली क्षेत्रमा भारी हिमपात पनि भएको छ। बागमती प्रदेशसहित पश्चिमका अधिकांश जिल्लामा आज वर्षा भएको र ति जिल्लाका उच्च पहाडी तथा हिमाली क्षेत्रमा हिमपात पनि गरायो।

आज राति देशको पहाडी र हिमाली भू-भागमा आंशिक बादल लाग्ने र बाँकी भू-भागमा मौसम मुख्यत: सफा रहनेछ। कोसी‚ बागमती र गण्डकी प्रदेशको उच्च पहाडी तथा हिमाली भू-भागका एक-दुई स्थानमा हल्का हिमपात/वर्षाको सम्भावना छ।

देशभर हिउँदे वर्षा‚ बढ्यो चिसो [फोटो फिचर]

भोलि (बिहीबार) तराई भू-भागका धेरै स्थानमा हुस्सु/कुहिरो रहने‚ कोसी‚ बागमती र गण्डकी प्रदेशको उच्च पहाडी तथा हिमाली भू-भागमा आंशिक बादल लाग्नेछ र बाँकी भू-भागमा मौसम मुख्यत: सफा रहने विभागले जनाएको छ।

कोसी‚ बागमती र गण्डकी प्रदेशको उच्च पहाडी तथा हिमाली भू-भागका एक-दुई स्थानमा हल्का हिमपात/वर्षाको हुनसक्ने जनाइएको छ।

यो पनि…

रसुवाको उत्तरी भेकमा हिमपात‚ जनजीवन प्रभावित