काठमाडौँ। स्वास्थ्य तथा खाद्य स्वच्छतामन्त्री निशा मेहताले सरकारले शासकीय सुधारका सयवटा कार्यसूचीमा केन्द्रित भएर काम गरिरहेको बताएकी छन्।

मन्त्रालयमा आइतबार सञ्चारकर्मीसँगको भेटघाट कार्यक्रममा उनले प्रधानमन्त्रीको निर्देशनअनुसार सरकारका प्राथमिकतामा परेका कार्य कार्यान्वयनमा मन्त्रालय केन्द्रित रहेको बताइन्। उनले मन्त्रालयमा सुधार गर्नुपर्ने धेरै क्षेत्र रहेको उल्लेख गर्दै आगामी दिनमा ती कार्यलाई प्रभावकारी रूपमा अघि बढाइने प्रतिबद्धता व्यक्त गरिन्।

त्यस अवसरमा स्वास्थ्य मन्त्रालयका सचिव विकास देवकोटाले अस्पताल सुधार, औषधि व्यवस्थापन तथा स्वास्थ्य सेवाको गुणस्तर अभिवृद्धिका लागि मन्त्रालयले विभिन्न नीतिगत सुधारका काम अघि बढाएको जानकारी दिए। उनले स्वास्थ्य क्षेत्रका दीर्घकालीन सुधारका लागि आवश्यक कानुनी तथा नीतिगत संरचना निर्माणलाई मन्त्रालयले प्राथमिकतामा राखेको बताए। साथै आगामी आर्थिक वर्षदेखि सुधारका कार्यक्रमलाई थप प्रभावकारी रूपमा कार्यान्वयन गरिने पनि देवकोटाको भनाइ छ।

कार्यक्रममा अबका दिनमा काम कारबाहीबारे नियमित जानकारी गराउन सञ्चारकर्मीसँग निरन्तर संवाद गरिने मन्त्रालयले जनाएको छ ।