काठमाण्डौ । अमेरिका र इरानबीच पुनः बढेको तनाव तथा स्ट्रेट अफ हर्मुजमा देखिएको ढुवानी अवरोधका कारण सोमबार अन्तर्राष्ट्रिय तेल बजारमा मूल्य वृद्धि भएको छ।
ब्रेन्ट क्रुडको मूल्य ०.६८ प्रतिशतले बढेर प्रतिब्यारेल ७२.४८ डलर पुगेको छ भने डब्लूटीआई क्रुडको मूल्यपनि १.१६ प्रतिशतले बढेर ७०.०३ डलरमा कारोबार भएको छ।

हालैका दिनहरूमा इरान र अमेरिकाबीच ‘टिट–फर–ट्याट’ आक्रमणहरू पुनः सुरु भएपछि हर्मुज जलसन्धि हुँदै हुने ऊर्जा ढुवानीमा अवरोध देखिएको छ, जसले विश्व बजारमा आपूर्ति जोखिम बढाएको छ।

गत हप्ता ब्रेन्ट तेलको मूल्य १०.६ प्रतिशतले घटेको थियो, जुन लगातार तेस्रो साप्ताहिक गिरावट थियो। तर त्यसपछि पुनः ढुवानी बढ्दै गएको संकेत देखिए पनि पछिल्लो तनावले बजारमा अस्थिरता कायम राखेको छ।

विश्लेषकहरूका अनुसार बजारले आपूर्ति छिटो सामान्य हुने अपेक्षामा कारोबार गरिरहेको भए पनि वास्तविक जोखिम अझै उच्च छ। विश्लेषकहरूले आपूर्ति पुनःस्थापना ढिलो भएमा तेलको मूल्यमा थप वृद्धि हुन सक्ने चेतावनी दिएका छन्।

हर्मुज क्षेत्रमा देखिएको ढुवानी अवरोध, ट्याङ्कर जाम, तथा संरचनागत क्षतिका कारण आपूर्ति पूर्व–संघर्ष स्तरमा फर्किन लामो समय लाग्न सक्ने बताएका छन्।

साउदी अरेबियाको सरकारी तेल कम्पनी साउदी अरामकोले रस तनुरा टर्मिनलबाट कच्चा तेल लोडिङ पुनः सुरु गरेको छ, जुन चार महिनापछि पुनः सञ्चालनमा आएको हो। यद्यपि सोही क्षेत्रमा भएको हेलिकप्टर दुर्घटनामा १४ जनाको मृत्यु भएपछि सञ्चालन जोखिमबारे चिन्ता थपिएको छ।