काठमाडौँ। अर्थमन्त्री स्वर्णिम वाग्लेले शतप्रतिशत पुँजीगत खर्च र राजस्व लक्ष्य प्राप्तिको योजनासहित बजेट कार्यान्वयनमा लाग्न सचिवहरूलाई निर्देशन दिएका छन्।

मन्त्रालयमा सोमबार आयोजित आव ०८३/८४ को बजेट कार्यान्वयन योजनासम्बन्धी सबै मन्त्रालयका सचिवहरू सम्मिलित बैठकमा उनले यस्तो निर्देशन दिएका हुन्। कार्यान्वयनमा आएको नयाँ बजेट पाँच वर्षको सरकारको आर्थिक मार्गचित्रअन्तर्गतको पहिलो किस्ताको सुरुवात भएको भन्दै उनले विगतको पुँजीगत खर्चको निराशा र राजस्व संकलनको कमजोरी सच्याउन सचिवहरूलाई निर्देशन दिए।

तोकिएको पुँजीगत खर्च पनि गर्न नसक्ने र राजस्व पनि उठाउन नसक्ने विगतको जस्तो अवस्था अब भोग्न नपर्ने गरी काम गर्न निर्देशन दिएको अर्थमन्त्रीको सचिवालयले जनाएको छ। “गएको आर्थिक वर्ष पुँजीगत खर्च निराशाजनक रह्यो। जम्मा ४९ प्रतिशत हाराहारी मात्रै। राजस्व पनि साढे १२ खर्ब हाराहारीभन्दा उठेन,” अर्थमन्त्री वाग्लेले सचिवहरूलाई भने, “चालु नयाँ बजेटमा यो नतिजा स्वीकार्य हुँदैन। कम्तिमा ८० प्रतिशत पुँजीगत खर्च हुनुपर्छ। मिसन १६ खर्बको राजस्व संकलन लक्ष्य पूरा हुनुपर्छ।”

बजेट कार्यान्वयनका लागि आवश्यक कानुनी र व्यवहारिक कठिनाइ निर्धक्क रूपमा अर्थ मन्त्रालयलाई भन्न र योजनाबद्ध रूपमा काम अघि बढाउन उनले सचिवहरूलाई आग्रह गरे।

अर्थ मन्त्रालयले बजेट कार्यान्वयन सहजीकरणका लागि गत आवदेखि गरिरहेको रकमान्तर तथा अबन्डा बजेटको विस्तृतीकरणको अधिकार सम्बन्धित मन्त्रालयलाई प्रत्ययोजन गरेको र त्यसको सदुपयोग गर्न पनि उनले आग्रह गरे।