बिर्तामोड। एलभीडी झापा महिला गोल्डकपको उपाधि नेपाल पुलिस क्लबले जितेको छ। झापाको शिवसताक्षीस्थित दूधे रंगशालामा सोमबार भएको फाइनलमा पुलिसले विभागीय प्रतिद्वन्द्वी एपीएफ फुटबल क्लबलाई १-० ले पराजित गर्दै उपाधि उचालेको हो।

खेलको सुरुवातमै दुवै टोली आक्रामक लयमा मैदान उत्रिएका थिए। खेलको तेस्रो मिनेटमा पुलिसकी पूजा रानाले पेनाल्टी बक्सबाहिरबाट दिएको सटिक क्रसमा मीना देउवाले पेनाल्टी एरियाबाट गरेको प्रहार एपीएफकी गोलकिपर अञ्जना राना मगरले बचाइन्। पाँचौँ मिनेटमा एपीएफले पनि गोलको अवसर बनाएको थियो तर कप्तान अनीता बस्नेतको क्रसमा निशा थोकरले गरेको प्रहार पोस्टमाथि बाट गयो।

२०औँ मिनेटमा पुलिसकी रेखा पौडेलले एपीएफका दुई डिफेन्डरलाई बिट गर्दै गरेको सट अञ्जनाले बचाइन्। तर, २२औँ मिनेटमा पुलिसले खेलमा अग्रता बनायो। रेखाले पेनाल्टी बक्सभित्र गरेको सट डिफेन्डरमा लाग्दै फर्किएको बल पेनाल्टी एरियामा अनमार्क रहेकी मीनासामु पुग्यो। मीनाले गोलकिपरलाई कुनै मौका नदिई बल जालीभित्र पठाउँदै पुलिसलाई १-० को अग्रता दिलाइन्।

३३औँ मिनेटमा एपीएफकी कप्तान अनीताले बराबरीको सुनौलो मौका गुमाइन्। अनीता केसीले दिएको भली क्रसमा उनले नजिकैबाट गरेको सट पोस्टको दिशा समात्न सकिनन्। त्यसपछि ३८औँ मिनेटमा सविता रानालाई लडाएपछि एपीएफले फ्रिकिक पायो तर कप्तान अनीता बस्नेतको सट पुलिसकी गोलकिपर उषा नाथले बचाइन्।

पहिलो हाफको अन्तिम मिनेटमा रेखा पौडेलको सट पोस्टको छेउबाट बाहिरियो। मीना देउवाले सेन्टर एरियाबाट तीन खेलाडीलाई बिट गर्दै रेखालाई पास दिएकी थिइन्।

दोस्रो हाफमा पनि खेल बराबरीको गतिमा अघि बढ्यो। ६२औँ मिनेटमा रेखा पौडेलको आक्रमक रन रोक्ने क्रममा एपीएफकी डिफेन्डर मनमाया दमाईले फाउल गरेपछि पहेँलो कार्ड पाउँदा पुलिसले फ्रिकिकको अवसर पायो। कप्तान अमृता जैशीले फ्रिकिकबाट गोलको प्रयास गरेकी थिइन् तर बल पोस्टबाट बाहिरियो।

८४औँ मिनेटमा एपीएफले बराबरीको अर्को मौका गुमायो। रश्मी घिसिङले पेनाल्टी बक्स बाहिरबाट रेनुका नगरकोटीलाई पास दिएकी थिइन् तर रेनुकाको प्रहार गोलपोस्ट नजिकबाट बहिरियो। ८९औँ मिनेटमा पनि रश्मीको आक्रमक सटलाई पुलिसकी गोलकिपर उषा नाथले बचाइन्।

अन्ततः खेलको २२औँ मिनेटमा मीना देउवाले गरेकी गोल नै पुलिसको जितको आधार बन्यो। नेपाल पुलिस क्लबले १-० को जितसहित उपाधि हात पार्दै ऐतिहासिक सफलता हाँसिल गर्‍यो।

उपाधिसँगै पुलिसले नगद १० लाख १० हजार रुपैयाँ, मेडल र ट्रफी पायो। उपविजेता बनेको एपीएफले नगद पाँच लाख रुपैयाँ प्राप्त गर्यो।

फाइनलपछि आयोजित पुरस्कार वितरण कार्यक्रममा सर्वोत्कृष्ट खेलाडी र सर्वाधिक गोलकर्ताको दुवै उपाधि पुलिसकी मीना देउवाले हात पारिन्। उनले प्रतियोगिता अवधिभर सात गोल गर्दै गोल्डकपकी टप स्कोरर बनेर २५ हजार र सर्वोत्कृष्ट खेलाडी बन्दै एक लाख ५० हजार रुपैयाँ प्राप्त गरिन्।

प्लेयर अफ द म्याचको उपाधि पुलिसकी पूजा रानाले जितिन्। अन्य उत्कृष्ट पुरस्कार विजेताहरूमा उत्कृष्ट गोलकिपर उषा नाथ (पुलिस), उत्कृष्ट डिफेन्डर मनमाया दमाईं (एपीएफ), उत्कृष्ट मिडफिल्डर रेनुका नगरकोटी (एपीएफ), उत्कृष्ट फरवार्ड अनिता बस्नेत (एपीएफ), उत्कृष्ट प्रशिक्षक भोला सिलवाल (पुलिस) र उदीयमान खेलाडी जेनिफर राना मगर (आर्मी) बने। सबै उत्कृष्ट विजेताले समान २५ हजार रुपैयाँ प्राप्त गरे।

पुलिसकी कप्तान अमृता जैशीको नेतृत्वमा विभागीय टोलीले बलियो रक्षा र तीव्र आक्रमणको प्रदर्शन गर्दै एपीएफलाई दबाबमा राख्यो। खेलभर मीना देउवाको सक्रियता, रेखाको आक्रमक मुड र उषा नाथको बचाउले पुलिसको जित सुनिश्चित गर्‍यो।

विजेता तथा उपविजेतालाई गोल्डकपका अध्यक्ष सन्तोष थोप्रा, प्रमुख अतिथि शिवसताक्षी नगरप्रमुख मेगाहाङ थोप्रा, झापा गोल्डकपका अध्यक्ष केदार गिरी, अन्तर्राष्ट्रिय झापाली समाजकी उपाध्यक्ष सीता पाण्डेलगायतले वितरण गरे।