पर्वत। जन्मेदेखि नै पूर्ण अपांगताको जीवन बिताउँदै आएकी पर्वतको जलजला गाउँपालिका ४‚ फड्केढुंगाकी २४ वर्षीया सुनीता विकले घरमै नागरिकता पाएकी छन्।

चौबीसै घण्टा बिस्तारामै पल्टिरहने भएका कारण परिवारले सदरमुकाम कुस्मामा रहेको जिल्ला प्रशासन कार्यालयसम्म ल्याउन नसक्ने भएपछि आज घरमै लगेर नागरिकता वितरण गरिएको हो। प्रमुख जिल्ला अधिकारी लक्ष्मीप्रसाद पौडेलसहित कार्यालयका कर्मचारी, स्थानीय वडाध्यक्ष भरत जीसीलगायतको सहभागितामा नागरिकता हस्तान्तरण गरिएको हो।

कार्यालयसम्म आएर सेवा लिन नसक्नेलाई नागरिकताजस्तो महत्त्वपूर्ण कागजातबाट वञ्चित हुन नपरोस् भनेर घरमै ल्याएर वितरण गरिएको प्रमुख जिल्ला अधिकारी पौडेलले जानकारी दिए। उनका अनुसार अपांगताको प्रकृति हेर्दा अत्यन्तै दयनीय रहेकाले सदरमुकाममा बोलाने कुनै उपायसमेत नभएको बताए।

नागरिकता पाएसँगै राज्यबाट पाउने सामाजिक सुरक्षा भत्तालगायत अन्य सहयोग प्राप्त गर्न सहज हुने प्रजिअ पौडेलको भनाइ छ। पीडित सुनीताका बाबु काला सुनारले पोलियो रोगका कारण छोरीको यस्तो अवस्था भएको बताए। जुनसुकै अस्पतालमा लैजाँदा पनि निको हुन नसकेको बताउँदै उनले पूर्ण रुपमा अपांगता हुँदा परिवारै समस्यामा परेको बताए। खाना खुवाउने, सरसफाइ गरिदिन एकजना पूर्ण रूपमा खटिनुपर्दा परिवारको अन्य गुजारा चलाउन समस्या भएको सुनारले बताए।

सुनीताका दुई दाजुको स्वास्थ्य अवस्था राम्रै छ। तेस्रो सन्तानको रूपमा जन्मिएकी उनी सुरुका आठ महिनासम्म ठीकठाकै भए पनि त्यसपछि स्वास्थ्य बिग्रिँदै गएको र अपांगताले थलिँदै गएको सुनारले बताए। नागरिकता बनेसँगै अब नियमित वडा कार्यालवाट भत्ता दिइने जलजला ६ का वडाध्यक्ष जीसीले जानकारी दिए।