काठमाडौँ। फिफा विश्वकप फूटबल प्रतियोगिताको आज भएको खेलमा इंग्ल्याण्डले क्रोएसियालाई पराजित गरेको छ।

अमेरिकाको डालास रंगशालामा भएको खेलमा इंग्ल्याण्डले ४–२ गोल अन्तरले क्रोएसियालाई पराजित गरेको हो।

खेलको १२औँ मिनेटमा इंग्ल्याण्डका लागि ह्यारी केनले पेनाल्टीमार्फत गोल गर्दै टोलीलाई सुरुआती अग्रता दिलाए। ३६औँ मिनेटमा क्रोएसियाका लागि मार्टिन बाटुरीनाले गोल गर्दै खेललाई बराबरीमा ल्याए।

४२औँ मिनेटमा केनले व्यक्तिगत दोस्रो गोल गर्दै पुनः इंग्ल्याण्डलाई अग्रता दिलाए भने पहिलो हाफमा थपिएको अतिरिक्त समयमा क्रोएसियाले जवाफी गोल फर्कायो। उसका लागि पिटर मुसाले गोल गरे पछि खेल पुनः बराबरीमा आयो।

खेलको ४७औँ मिनेटमा जुड बेलिङहमले गोल गरेपछि इंग्ल्याण्डले पुनः खेलमा अग्रता लियो। त्यसपछि खेलको ८५औँ मिनेटमा मार्कस रासफोर्डले एक गोल गरेपछि इंग्ल्यायण्डले अग्रता दोब्बर बनायो। त्यसपछि खेलमा कुनै गोल भएन र खेल इंग्ल्याण्डले खेल जित्यो।

हाल प्रतियोगिताअन्तर्गत घाना र पानामाबीचको खेल जारी छ भने आज बिहान ७ः४५ बजे उज्बेकिस्तान र कोलम्बियाले प्रतिस्पर्धा गर्दैछन्।